【客華雙語】歸來了！彭佳慧壓軸嗨翻《歸心》 驚喜同台Ella合唱客語歌直呼完成夢想

新華報導＼1987創刊

透過音樂推動客家文化介入主流，客家委員會邀陣高雄市政府15號在高雄流行音樂中心共下鬧棚舉行《歸心》演唱會，邀請金曲雙語歌后彭佳慧（Julia）、影視歌三棲大腳士陳嘉樺（Ella）、爵士女伶王若琳（Joanna）同得著三金肯定暨國際音樂詩人林生祥4組實力派唱將演出。尾下壓軸登場个彭佳慧同陳嘉樺毋單淨在台頂用客話打嘴鼓，乜分人想毋著个合唱客語歌仔〈歸來〉，彭佳慧感動到緊講總算完成個人夢想！

彭佳慧在演唱會唱吔〈我在客廳做的夢〉、〈大齡女子〉、〈舊夢〉、〈我要把你嚇死喔〉等熱門歌曲，台下个歌迷乜熱情大聲喊細妹恁靚！彭佳慧講，非常感謝客委會、高雄市政府、總策劃羅文裕同所有到場支持个歌迷，乜講將會在6月7號在台北小巨蛋表演。陳嘉樺一上台就熱情个用客話同歌迷相借問，表示到高雄流行音樂中心開唱就有一種歸到屋下个感覺！還唱吔S.H.E經典組曲同帶動跳〈來個蹦蹦〉暢樂歸場，現場歌迷都安腦這場演唱會根本就係加賺个。

生祥樂隊一連帶來〈化胎〉、〈我庄〉、〈面帕粄〉等為家鄉做个曲，唱出客家伙房、味緒同回憶。林生祥在中場轉擺个時節紹介南北客庄粄條無相同，推薦大家去美濃記得食一碗「面帕粄」正歸去。另外，王若琳用抒情美聲餳吔全場論千个歌迷，用客話獻唱《茶金》插曲〈詩的第一行〉同〈You're Breaking My Heart〉，乜分享自家從細聽阿太、阿嬤同阿爸用客話譫哆，自家嗄學無麼个單字，蓋歡喜這下做得用歌仔來學客話。

演唱會由拖勻12歲盡後生个兒童搖滾樂團J Hall打頭陣開唱，還過大場面合作「天生歌手兒童合唱團」共下表演〈茶頂山的風〉客語歌仔，細細个圓身嗄毋驚山得著現場盡熱情个掌聲。在中場表演个高人氣男團Ozone乜無輸陣，用堅強唱跳實力唱到鬧熱煎煎，又同〈World Top〉改編做客語版致敬客家文化。Ozone乜講出，這係第一擺挑戰全新領域个客語歌，蓋感謝羅文裕先生扌帣手正音完善表演。

《歸心》係高雄流行音樂中心頭到用華語、客語音樂為主个大型活動，總策劃暨金曲歌王羅文裕特別用「回歸初心」為題，邀請歌手唱出城市遊子个歸鄉情懷，喚起心肚單純个情感。客委會副主任委員范佐銘代表主任委員古秀妃，同高雄市政府秘書長郭添貴還過客家事務委員會主委楊瑞霞、立委邱議瑩同黃捷等人都到場欣賞表演，共下見證無共風格个音樂人，仰仔用母語融合經典同流行來展現世代傳承。